Струга ја запиша првата победа во новата сезона од Супер машката лига, откако на домашен терен го совлада Бутел Скопје со 26-24 во натпревар кој до последните секунди беше неизвесен.
Гостите од Скопје одиграа борбено и долго време му парираа на домашниот состав. Резултатската неизвесност траеше практично до самиот крај, а Бутел влезе во последната минута со израмнети 24-24.
Тогаш Струга го направи решавачкиот чекор. Јукиќ погоди за 25-24, по што Бутел не успеа да реализира во својот напад. Домашните ја искористија грешката на противникот и преку Костоски го постигнаа голот за конечни 26-24.
Кај Струга најефикасни беа Јукиќ и Георгиевски со по шест гола, додека Мице Шилегов постигна пет.
Бутел Скопје имаше расположен голман во Градимир Чаневски, кој запиша 11 одбрани, но ниту тоа не беше доволно за гостите да стигнат до првата победа во сезоната. Димитар Ѓеоргиевски беше најдобар стрелец во нивните редови со девет погодоци.
Струга со триумфот ги освои бодовите на домашен терен, додека Бутел ќе ја бара првата сезонска победа во следните натпревари.
