В сабота Младост ќе го одигра натпреварот од 4. коло на Супер лигата, а пред мечот со Алкалоид кој ќе се игра во салата „Млаз“, направивме краток разговор со новиот ракометар на тимот од Богданци, Жељко Пеиќ Тукуљац.
Искусниот ракометар кој може да одговори на позициите лев и среден бек, вели дека во екипата го прифатиле одлично, дополнува дека атмосферата е одлична, а луѓето во Богданци дека го сакаат ракометот.
„Екипата ме прифати одлично. Атмосферата е добра, луѓето во Богданци го сакаат ракометот, а тоа се виде и на двете натпревари што ги одигравме на домашен терен. Убаво е да се игра во таков амбиент“, вели Пеиќ за Спортска Мрежа.
Пејиќ зборуваше за натпреварите кои досега ги одигра Младост, а особено несреќниот пораз со Прилеп пред домашната публика.
„На трите натпревари видовме дека можеме да играме со секого. Против Прилеп од почетокот тргнавме силно и го почитувавме договореното, сè до некаде 15 минути пред крајот, кога дојде до пад на концентрацијата и недостиг на искуство. Тој натпревар го оставивме зад нас и продолживме да се подготвуваме за следните натпревари“, разкажува новото засилување на Младост.
За мечот со Алкалоид, потенцира дека ќе го дадат својот максимум за да може да стигнат до позитивен резултат, со поддршка од публиката, за која истакна дека е феноменална.
„Се подготвуваме за натпреварот со Алкалоид и ќе дадеме сè од себе. Ќе ни значи поддршката од публиката, како и досега. Публиката и атмосферата во салата „Млаз“ се феноменални“, дополнува искусниот ракометар.
Натпреварот меѓу Младост и Алкалоид се игра во сабота од 18:30 часот во салата „Млаз“ во Богданци.
