Женската ракометна репрезентација на Македонија со победа го започна настапот на домашниот турнир „Трофеј Македонија 2026“, откако во Охрид ја совлада Србија со убедливи 29:21. За новиот селектор Игор Марковиќ, ова беше победничко деби на македонската клупа.
Нашата селекција уште од самиот почеток наметна силен ритам, пред сè преку цврстата одбрана и добрата реакција на голманката Петковска. Македонија брзо создаде предност од 5:2, а со дисциплинирана игра и искористување на грешките на противникот разликата постојано растеше.
Ристовска, Ризоска, Арсениевска и Младеновска беа меѓу главните носители на нападот, а до средината на првиот дел Македонија веќе имаше сериозна предност. Српските ракометарки имаа проблеми со реализацијата и направија низа технички грешки, што домашниот состав умешно ги казнуваше. На паузата Македонија замина со убедливи 17:9.
Србија се обиде да се врати во игра на стартот од второто полувреме и успеа да намали дел од негативата, но Македонија брзо одговори. Во моментите кога гостинската селекција се закани со дополнително намалување на разликата, Марковиќ реагираше со тајм-аут, по што следуваа нови погодoци и повторно зголемување на предноста.
До финишот македонската селекција целосно го контролираше натпреварот. Марковиќ им даде шанса и на останатите ракометарки, па Македонија со изменет состав ги одигра последните минути и без проблем ја приведе средбата до крај за конечни 29:21.
Капитенката Сара Ристовска беше меѓу најдобрите на теренот и беше прогласена за МВП, со седум, односно според записникот осум погодоци, додека Ангела Јанкуловска постигна пет, а Емилијана Ризоска и Младеновска по четири.
Кај Србија најефикасни беа Александра Васиќ со седум и Милица Оташевиќ со пет гола.
Триумфот е уште позначаен бидејќи Македонија на победа над Србија во сениорска конкуренција чекаше од Европското првенство во 2008 година, кога во Скопје славеше со 31:30.
На турнирот и двете селекции настапуваат во комбинирани состави. Србија пристигна со значително подмладен тим и дури девет дебитантки, додека кај Македонија недостасуваат Јована Мицевска Митев, Марија Јанкуловска и Теодора Дукоска.
Македонија утре продолжува со настапите на „Трофеј Македонија“. Од 17:30 часот противник ќе биде Црна Гора, додека Србија претходно, од 15:30 часот, ќе игра против Хрватска.
