Со поделба на бодовите и резултат 20:20 започна новото издание на „Трофеј Македонија“, откако Црна Гора и Хрватска одиграа израмнет и неизвесен натпревар во салата „Билјанини Извори“ во Охрид.
Црногорките подобро го отворија натпреварот и во првиот дел имаа предност од четири гола, 9:5, но Хрватска постепено се враќаше во игра. И покрај бројните грешки на двете страни, избраничките на Лазовиќ успеаја на пауза да заминат со минимално водство од 11:10.
Во второто полувреме се играше во ритам гол за гол, со чести промени на водството. Хрватска успеа да го преземе резултатот во завршницата, но Црна Гора не дозволи натпреварот да ѝ избега од раце.
Во драматичниот финиш, Јауковиќ прво пропушти можност од седум метри, но потоа се искупи со погодок за 19:19. Хрватска преку Вуковиќ повторно поведе, но во последниот напад Црна Гора ја одигра акцијата до крај, а токму Јауковиќ погоди за конечни 20:20.
И двете селекции во Охрид настапија со комбинирани состави, со повеќе млади ракометарки кои добија можност да се наметнат на турнирот.
