Пред Младост Богданци е нов предизвик во ракометната Суперлига. Во рамките на четвртото коло, тимот на домашен терен ќе го пречека Алкалоид во салата „Млаз“, каде повторно се очекува голема поддршка од трибините.
Младост во првите три кола од враќањето во елитата покажа дека може да биде конкурентен и против поискусни суперлигашки состави. Богданчани ремизираа на гостувањето кај Бутел, несреќно загубија од Прилеп и одиграа борбен натпревар против актуелниот шампион Вардар.
Еден од младите ракометари кои ја добиваат својата шанса во најсилната конкуренција е Стамен Гогов, кој истакнува дека адаптацијата на Суперлигата е процес, но досегашните натпревари му даваат причина за оптимизам.
„Искрено, задоволен сум и од себе и од целата екипа. Дел од нас поединци за првпат играме во Супер лига, па нормално е да ни треба време за адаптација. Сепак, покажавме дека можеме да се носиме со секој противник. За Прилеп жалиме што ја испуштивме победата, но немаме простор за враќање назад ,гледаме напред, учиме од грешките и продолжуваме уште посилно“, рече Гогов за Спортска Мрежа.
Младиот ракометар го најави и дуелот со Алкалоид, кој за Младост ќе биде нова можност за докажување во елитата. Гогов посебно ја истакнува атмосферата во тимот, но и значењето на поддршката од домашната публика.
„Натпреварот со Алкалоид ќе биде голем предизвик, но и мотивација за нас. Како млад играч, ваквите натпревари ми значат многу бидејќи стекнуваме искуство и имаме можност да се докажеме. На тренинзите даваме максимум, хемијата во екипата е на високо ниво и со поддршката од полната сала „Млаз“ се надеваме на добар резултат“, дополнува Гогов.
Младост и Алкалоид ќе се сретнат во сабота од 18:30 часот во салата „Млаз“ во Богданци. По одличната атмосфера на претходните домашни натпревари, се очекува трибините повторно да бидат исполнети до последното место, а Младост со поддршка од своите навивачи да бара нов позитивен резултат во Суперлигата.
