Денес ќе биде комплетирано второто коло во Втората македонска фудбалска лига со двата одложени натпревари во Радовиш и Тетово. И двата дуели носат голема тежина, бидејќи освоените бодови можат да предизвикаат сериозни промени на табелата.
Во Радовиш, Детонит Плачковица ќе го пречека Охрид во натпревар во кој домашниот состав ќе бара прекин на негативната серија и враќање на победничките патеки. Радовишани имаат два последователни порази, додека „рибарите“ во овој дуел влегуваат со јасна цел – да ги освојат трите бода и со победа да се вратат на врвот од табелата.
Токму затоа, притисокот ќе биде присутен и кај составот на Горан Здравков, но и кај екипата на Ромео Кочоски. Детонит Плачковица со триумф би можел да направи скок до четвртото место, но истовремено и да стави крај на серијата од два порази.
Во Тетово, односно во Јегуновце, пак, силите ќе ги одмерат Тетекс и Работнички, во уште еден дуел кој може значително да влијае врз изгледот на табелата.
„Штофарите“ со победа би се вратиле на победнички патеки и би направиле скок до шестото место, додека Работнички со триумф би имал можност да напредува до четвртата позиција.
Сепак, ситуацијата за „романтичарите“ може да стане уште поинтересна ако се земе предвид дека тимот има уште еден заостанат натпревар – домашниот дуел против Брера Струмица од петтото коло. Доколку Работнички ги освои бодовите во двата натпревари, во игра би имал вкупно шест бода, што би му отворило можност за искачување до самиот врв на второлигашката табела.
Двата натпревари се закажани за 15:30 часот, па попладневните дуели во Радовиш и Тетово ќе дадат нова слика за лидерската трка и борбата за позициите во горниот дел од табелата.
