Македонската тенисерка Лина Ѓорческа не успеа да ја мине првата пречка на ВТА 125 турнирот во Анкара, откако во три сета беше поразена од Ксенија Зајцева со 1-2 (7:5, 3:6, 4:6). Мечот траеше два часа и осум минути.
Турнирот во Анкара се игра за награден фонд од 115.000 американски долари.
Ѓорческа одлично го започна мечот и го освои првиот сет со 7:5. Македонката направи брејк за предност од 4:2, но Зајцева веднаш возврати и го врати загубениот сервис. Сепак, Ѓорческа во 12. гем повторно направи брејк и го освои сетот.
Во вториот сет, по загубениот гем на свој сервис на стартот, Ѓорческа успеа да се врати и да израмни на 3:3. Сепак, Зајцева потоа освои три гема во низа и го израмни резултатот во сетови.
Украинската тенисерка подобро го започна решавачкиот сет и поведе со 3:0, но Ѓорческа не се предаде и со три последователни гема стигна до 3:3. Зајцева потоа повторно поведе со 4:3, а до крајот на мечот следуваше серија од четири гема во кои двете тенисерки си правеа брејк. Последниот го освои Зајцева, со што го комплетираше пресвртот и обезбеди пласман во следното коло.
Ѓорческа од настапот во Анкара освои еден ВТА поен.
