Македонскиот претставник Штип УГД на 21 октомври ќе го има своето деби во најсилното европско клупско натпреварување – Лигата на шампионите. Европската одбојкарска конфедерација (ЦЕВ) ги потврди термините за натпреварите од првата квалификациска фаза.
Актуелниот освојувач на двојната круна во македонската одбојка, Штип УГД, по ланскиот историски настап во европските клупски купови, сезонава за првпат ќе се натпреварува во Лигата на шампионите. Штипјани во првото квалификациско коло ќе се соочат со холандскиот Орион Старс.
Првиот натпревар ќе се одигра на гостински терен, на 21 октомври од 20:00 часот, во „Топспортхал“ во Дутинхем, Холандија. Реваншот е закажан за 28 октомври од 18:00 часот во салата „Џексон“ во Штип.
Победникот од овој двомеч ќе обезбеди пласман во второто квалификациско коло, каде што го очекува словенечкиот АЦХ Волеј од Љубљана.
Тимот што ќе биде елиминиран, пак, ќе го продолжи европскиот настап во второто по ранг клупско натпреварување – ЦЕВ Купот. Поразениот од овој двомеч е слободен во првото коло и директно ќе се пласира во 1/16-финалето.
