Сара Митевска и Марко Алексовски забележаа убедливи победи и обезбедија пласман во третото коло на Европското првенство за тенисери и тенисерки до 16 години, кое се одржува во Парма, Италија.
Митевска во второто коло ја совлада Тинкара Сеп од Словенија со 2-0 во сетови (6:2, 6:2), додека Алексовски беше подобар од Николас Шилц Солви од Луксембург со идентични 2-0 (6:3, 6:2).
Во третото коло Митевска ќе се соочи со Емесе Серкади од Унгарија, додека противник на Алексовски ќе биде Холанѓанецот Матс Хуте.
Алексеј Стојановски го заврши настапот во сингл-конкуренција по поразот со 0-2 од Томи Лукс од Чешка, а денеска претрпе пораз и во мечот за пласман. Од турнирот е елиминирана и Лина Николовска, која во второто коло загуби од Андреа Папакирјаку од Кипар.
Македонските претставници не успеаја да обезбедат пласман во следната рунда ниту во конкуренција на двојки. Алексовски и Стојановски беа поразени од Колин Ландри и Сем Ван де Лангенберг, додека Митевска и Николовска загубија од Ајше Бол и Танем Јилмаз.
