Третото коло на женската ракометна Супер лига донесе реми меѓу Ѓорче Петров 2 и Спартак, откако двете екипи ремизираа играјќи 23:23.
„Лавиците“ постојано имаа предност во текот на мечот која на полувреме беше највисоки плус шест односно 14:9.
Во вториот дел Спартак имаше сили да го израмни резултатот во неколку наврати, но не и за целосен пресврт, а пак Ѓорче Петров 2 одново собра сили и во 54. минута дојде до водство од 23:19.
Во 59:40 минута Спартак побара тајм-аут, а потоа на една секунда до крајот Анастасија Николовска постигна гол за реми (23:23) и делба на бодовите.
Марија Анчева беше најдобар стрелец на „лавиците“ со шест гола, а по четири постигнаа Славица Мркиќ Стојанов и Марија Димоска, кај Спартак со по пет гола се истакнаа Петра Јерсек, Сара Цветановска и Анастасија Николовска.
Атлетик стигна до дебитантска победа на домашен терен откако со 28:18 убедливо славеше над Деспина. Во текот на целиот меч Атлетик имаше постојано високо водство и не му дозволи на противникот да дојде во ситуација ниту на момент да фати резултатски приклучок.
Анастасија Дамјановска со осум гола беше прво име кај Атлетик, а пак Матеа Христоска беше најдобар стрелец кај Деспина.
Шампионот Ѓорче Петров го декласираше Пелистер со неверојатни 46:13, во меч каде повеќе „лавици“ се истакнаа кога е во прашање реализацијата на погодоци.
Емилијана Ризоска беше прво име со осум гола, а по седум постигнаа Анџела Губериник и Ана Вранциќ.
Кај битолскиот тим прво име со пет гола беше Еџе Сејадин.
Чаир забележа убедлива победа над Вардар со резултат од 23:31. „Вардарки“ парираа само до 20-тата минута, а потоа разликата постојано се зголемуваше и веќе се беше решено.
Ивана Трифуновска со седум гола беше прво име кај Вардар, кај Чаир со осум гола се истакна Михаела Кралева, а по шест гола постигнаа Стефанија Ѓорѓиевска и Ноура Махмоуд.
Во однос на табелата шампионот Ѓорче Петров е на врвот со три од три и максимални шест бодови, Спартак е втор со пет бодови, а пак Чаир со форма од две победи и еден пораз е трет со четири бодови.
Ѓорче Петров 2 го држи четвртото место со три бодови, Вардар и Атлетик го делат петтото место со по два бодови, а пак Деспина и Пелистер имаат по еден бод.
