Струга Трим Лум ја оправда фаворитската улога и со убедливи 6:0 го совлада Арсими во натпреварот од 8. коло во Првата македонска фудбалска лига. Стружани одиграа две сосема различни полувремиња, а отпорот на гостите целосно беше скршен во продолжението.
Домаќинот уште од почетокот ја презеде иницијативата. Марјан Радески прв се закани, а во 22. минута Струга постигна гол по мешаница во шеснаесетникот, но по ВАР-проверка погодокот беше поништен поради офсајд. До паузата Арсими успеваше да го сочува голот, пред сè благодарение на голманот Дејан Силјановски, кој неколкупати одлично интервенираше.
Работите на теренот целосно се променија во второто полувреме. Во 57. минута Радески шутираше од далечина, а поради лизгавата топка во дождливите услови Силјановски не успеа да ја скроти и Струга поведе со 1:0.
Само неколку минути подоцна Арсими остана со десетмина, откако Мислими заработи втор жолт картон. Бројчаната предност стружани веднаш ја претворија во уште поголема доминација.
Во 67. минута Меметриза Хамза испрати одличен центаршут, а Радески со удар со глава го зголеми водството на 2:0. Само две минути подоцна Алтин Алији стрелаше за 3:0, а во 75. минута Радески повторно беше во центарот на вниманието и со прекрасен удар го комплетираше својот хет-трик.
Струга не застана ниту потоа. Во 80. минута нововлезениот Флоријан Рочи го постигна петтиот гол, додека капитенот Буњамин Шабани во 88. минута со одличен удар од далечина ги постави конечните 6:0.
Така, Струга ТЛ стигна до убедлив триумф пред репрезентативната пауза и се зацврсти на втората позиција со 17 бодови, со само два бода помалку од лидерот Шкендија.
