По комплетирањето на првото коло во ЕХФ Европскиот куп, познати се сите 64 екипи кои ќе ја продолжат битката во второто коло. Меѓу нив се и трите македонски претставници – бранителот на трофејот Охрид, Алкалоид и Бутел Скопје.
Последниот македонски претставник кој настапи во воведната рунда беше Тиквеш. Кавадарчани забележаа победа во реваншот против Еш, но поради поразот од првиот натпревар со три гола разлика, не успеаја да ја надоместат негативата и го завршија европскиот настап. Еш, пак, со вкупни 61-59 обезбеди место во следната фаза.
Во второто коло ќе настапат 64 екипи – 19 кои пласманот го обезбедија преку првата рунда и 45 кои беа директно пласирани. Меѓу најзвучните имиња се и пет поранешни освојувачи на трофејот: Охрид, Алкалоид, Војводина, Нербо и АЕК.
Охрид, Алкалоид и Бутел утре ќе ги дознаат своите противници. Ждрепката ќе се одржи во Виена на 22 септември со почеток во 11:00 часот, а ќе биде достапен и директен пренос преку каналот Home of Handball. При извлекувањето ќе важи правилото за заштита на националноста, односно македонските екипи нема да можат да добијат противник од Македонија.
Шеесет и четирите учесници ќе бидат распоредени во четири групи по 16 екипи, со по осум тима во првиот и вториот шешир во секоја група. Распоредот на шеширите е одреден според рангирањето на екипите.
За македонските претставници европската сезона продолжува во октомври. Првите натпревари од второто коло ќе се играат на 17 и 18 октомври, додека реваншите се закажани за 24 и 25 октомври.
Охрид, како актуелен европски шампион, ќе го започне патот кон одбраната на трофејот од второто коло, додека Алкалоид и Бутел исто така ќе го чекаат своето место во ждрепката и противниците со кои ќе се соочат во продолжението на европската авантура.
