Штипскиот прволигаш Астибо доби нов тренер – Габриела Величковска, која по успешната играчка кариера направи нов чекор во ракометот и започна ново поглавје како тренер.
Триесет и двегодишната Величковска зад себе има богато играчко искуство, вклучително и долгогодишни настапи во странство. Ракометниот пат го започна во ЖРК Металург, каде што поминала значаен дел од кариерата, а потоа настапувала и за Пелистер и ЖРК Чаир.
Штипјанката своето искуство го надградуваше и надвор од Македонија, градејќи меѓународна кариера во Франција. Таму го носеше дресот на Ла Пужен и Кот Баске, што дополнително ја збогати нејзината ракометна биографија.
По завршувањето на играчката кариера, Величковска веднаш продолжи во ракометот, но во нова улога. Во сезоната 2025/2026 беше тренер на пионерската екипа на ЖРК Чаир, а сега доби можност да предводи сениорски состав и да го преземе Астибо.
За штипскиот клуб ова е нов почеток по турбулентниот период. Минатата сезона Астибо поради финансиски проблеми го откажа настапот во Суперлигата, по што се врати во понизок ранг и оваа сезона се натпреварува во Првата лига, со состав во кој доминираат домашни и млади ракометарки.
Тренерското деби на Величковска дојде на гостувањето кај Стружанка, каде што Астибо претрпе пораз од 26:20 во спортската сала „Тими“. Домаќинот до победата го предводеше Маја Раткушиноска со 11 гола, додека кај штипскиот состав најефикасна беше Ана Марија Накова со осум погодоци.
Иако стартот не донесе позитивен резултат, за Величковска ова е почеток на една нова кариера – овојпат покрај теренот, каде што стекнатото долгогодишно играчко искуство ќе се обиде да го пренесе на младите ракометарки на Астибо.
