Драматична завршница имаше натпреварот во СРЦ „25 Мај“ откако Радовиш и Драчево Јуниор ремизираа играјќи 33:33 за делба на бодовите, во рамките на 2. коло на Првата ракометна лига.
Натпреварот започна со егал борба и игра гол за гол, а во самиот финиш на првиот дел радовишани направија прва осетна разлика кога заминаа со предност од плус три при 16:13.
Во вториот дел Радовиш имаше и плус четири кога резултатот беше 24:20, а потоа Драчево Јуниор влезе во серија од четири гола за 24:24, а потоа од 26:26 гостинот го презеде водството и имаше и плус три на 28:31.
На резултат од 31:32 радовишани побараа тајм-аут, по што следуваше вистинска драма во девет секунди. Во 59:46 Стојанче Ристов погоди за 32:32, во 32:33 Александар Стојменов постигна гол за 32:33 и водство на Драчево Јуниор. На пет секунди Иванче Ончев постигна гол за 33:33, по што Драчево Јуниор организираше напад, но не реализираше, а по мечот имаше и „ВАР“ проверка, но без досудување на седмерец за гостите, па двете екипи ги поделија бодовите.
Преспа го запиша вториот пораз на стартот од сезоната откако загуби во Гевгелија од Партизан со 29:27. Натпреварот во кој тимот од градот на јаболкото постојано беше во негатива, а деветте погодоци на искусниот Томче Трајчевски не беа доволни за Преспа да го запише првиот триумф.
Кај домаќинот со осум гола се истакна Илија Пејковски, а шест имаше Горан Лисичков.
Текстилец УГД имаш два од два на стартот од новата сезона откако штипјани славеа над Македонија ЃП во гости со 34:36.
Домаќинот подобро влезе во натпреварот кога имаше предност од 8:4, а потоа работите на теренот се променија и гостинот од Штип имаше предност од пет погодоци при 10:15, а на полувреме замина со 17:19.
Во текот на второто полувреме Текстилец УГД ја одржуваше предност Македонија ЃП најблиску беше на минус гол, а потоа успеа во 53. минута и да дојде до 30:30. Самата завршница беше неизвесна, но со среќен крај за Текстилец УГД.
Со по девет гола кај домаќинот се истакнаа Бојан Чакалиќ и Михаел Тотиќ, кај гостинот Филип Џинес имаше осум гола, а Јован Величков седум.
Во однос на табелата по четири бодови имаат Пролет, Партизан и Текстилец УГД, по два бора имаат Македонија ЃП, Илинден, Овче Поле, Јехона, Драчево Јуниор, Шампион и Аеродром, по еден бод имаат Радовиш и Вардар Неготино, а без бодови по два меча се екипите на Преспа и Сокол Саса.
