Драчево Јуниор ремизираше против Радовиш во гости играјќи 33:33 во меч од второто коло на Првата ракометна лига.
Веднаш по мечот, скопскиот тим излезе со соопштение во однос на судењето, нагласувајќи дека имало спорни судиски одлуки и дека РК Драчево Јуниор е оштетен.
- Во продолжение целосното соопштение на РК Драчево Јуниор:
„СПОРНИ СУДИСКИ ОДЛУКИ – РК ДРАЧЕВО ЈУНИОР ОШТЕТЕН. Како клуб имаме целосна почит кон судиите и нивната работа, особено кога станува збор за судии со ЕХФ лиценци и за натпревари на кои е присутен и VAR систем. Но, она што се случи на натпреварот против Радовиш мора да биде споменато. Во една од клучните ситуации, при празен гол, противнички играч брани топка внатре во просторот од 6 метри, со што според нас е направена ситуација за седмерец. Одлуката беше да нема пенал. Она што дополнително остава дилема е фактот што ситуацијата е разгледувана и на VAR, но повторно не е досуден седмерец. Уште една спорна ситуација се случува при изведување на центарот. Во моментот на изведувањето, тројца играчи на Радовиш се наоѓаат во нашата половина, а веднаш потоа е постигнат гол. Не бараме ништо повеќе од еднакви услови и правилно применување на правилата за двете екипи. Кога имате судии со ЕХФ лиценци и на располагање VAR технологија, природно е да се постави прашањето како вакви ситуации не се санкционирани. РК Драчево Јуниор продолжува понатаму, но за ваквите ситуации мора да се зборува“, се вели во клупското соопштение.
За Драчево Јуниор ова е второ последователно реми, а пак за РК Радовиш ова е прв бод.
