Пелистер продолжува со одличните настапи во Првата македонска женска фудбалска лига, откако битолчанки стигнаа до петтата сезонска победа во низа. Во рамките на 6. коло, Пелистер славеше со 1:2 на гостувањето кај Кочани.
По првото полувреме без голови, Михаела Марковска ја презеде одговорноста и со два погодоци му донесе предност од 0:2 на Пелистер. Кочани успеа да намали во 84. минута преку искусната Катарина Милеска, но немаше доволно време за целосен камбек.
На убедлив начин до нови три бода стигна и Каменица Саса, која на Градскиот стадион во Македонска Каменица со 5:0 го совлада АС Јунајтед од Струга.
Главна фигура во триумфот на Саса беше капитенката Ана Димитровска, која постигна дури четири гола, додека еден погодок додаде бугарската интернационалка Антонина Шопска.
Во останатите натпревари од 6. коло, Тиверија Брера со неверојатни 17:2 ја совлада Речица, натпревар за кој Спортска Мрежа веќе објави детален извештај , со седумте гола на 18-годишната Теона Галабовска како посебен белег.
Шампионот Скопје, пак, вчера со 4:0 славеше против Истатов и продолжи со успешните настапи во сезоната.
Колото ќе биде комплетирано утре во Тетово, каде што Љуботен ќе го пречека Вардар.
