Еурофарм Пелистер стигна до вториот триумф во новата сезона од Супер лигата, откако на гостувањето кај Струга славеше со убедливи 33-25. За битолчани ова беше прва победа на гостински терен по три одиграни натпревари.
Иако Лино Червар повторно не можеше да смета на дел од странските засилувања, домашните ракометари успешно ја завршија задачата и уште во првото полувреме направија значајна разлика. Еурофарм Пелистер на паузата замина со плус седум, 16-9.
Струга во продолжението успеа да го намали заостатокот и во еден момент да се доближи на четири гола негатива, но гостите не дозволија пресврт. Битолчани повторно ја презедоа контролата и во финишот ја потврдија убедливата победа.
Капитенот- Филип Кузмановски беше прв стрелец кај победникот со седум гола, додека Петар Атанасијевиќ и Ненад Белистојаноски постигнаа по шест. Значаен удел имаше и Никола Митревски, кој натпреварот го заврши со 11 одбрани, а Давид Брестовац во вториот дел додаде уште три интервенции.
Во редовите на Струга, Костадин Петров постигна пет гола, а Никола Јукиќ четири. Голманскиот тандем Мартин Јовановски – Кристијан Костадиновски заедно запиша осум одбрани.
Во следното суперлигашко коло Еурофарм Пелистер го очекува дуел со својот втор тим, додека Струга ќе бара први бодови во сезоната на домашен терен против Бутел Скопје.
