Тиквеш со пораз го започна европскиот двомеч со Еш во првото коло од ЕХФ Европскиот куп. Кавадарчани загубија со 30-27, но разликата не е недостижна, бидејќи утре следува вториот натпревар, повторно во спортската сала „Јасмин“.
Домашниот состав имаше одличен почеток и рано поведе со 4-1, но Еш брзо воспостави резултатска рамнотежа. До крајот на првото полувреме се играше во израмнет ритам, па двете екипи на пауза заминаа со 14-14.
Во продолжението гостите постепено ја презедоа контролата и во еден момент стигнаа до четири гола предност, 25-21. Тиквеш успеа да се врати во игра и со погодоците на Ончев и Симиќ, а потоа и на Чејовиќ и Ончев, дојде на само еден гол негатива, 27-26.
Сепак, во завршницата ракометарите на Еш беа поконцентрирани, и постигнаа два гола, па така победија на првиот натпревар со 30-27.
Бен Махфуд беше најефикасен кај Тиквеш со девет погодоци, додека Ончев постигна пет. Кај гостите, Аговиќ заврши со шест, а Аранда со пет гола.
Реваншот е утре од 18:00 часот во „Јасмин“, а Тиквеш ќе има можност пред домашната публика да ја анулира негативата од првиот натпревар и да обезбеди пласман во второто коло од ЕХФ Европскиот куп.
