ГРК Охрид продолжува со сигурни настапи во македонската Супер лига, откако на гостувањето кај Бутел Скопје славеше со 41-32.
Охриѓани уште во воведните минути покажаа зошто ја имаат фаворитската улога. Тимот на Борис Ројевиќ го отвори натпреварот со убедливи 5-0 и веднаш воспостави контрола врз резултатот.
Домашниот состав преку Стаменковски и Богдановски успеа да ја прекине серијата на гостите, но Охрид брзо ја врати контролата и не дозволи неизвесност. До паузата предноста веќе беше 21-14, со што победникот практично беше најавен уште по првите 30 минути.
Во второто полувреме Охрид без поголеми проблеми го одржуваше водството и рутински го приведе натпреварот до крај за нов триумф во шампионатот.
Најефикасен во охридскиот состав беше Дарко Ѓукиќ со десет погодоци, додека кај Бутел Скопје прв стрелец беше Дејан Михајловиќ со пет гола.
Во наредното коло Охрид ќе биде домаќин на Прилеп, додека Бутел Скопје ќе гостува во Струга.
