Дебитантот во Втората македонска фудбалска лига, Камјани, се раздели со тренерот Бурхан Емурлаи. Клубот информираше дека двете страни постигнале меѓусебен договор за прекин на соработката, по околу 70 дена заедничка работа.
Од Камјани му се заблагодарија на Емурлаи за професионалноста, позитивниот пристап, посветеноста и односот кон клубот, истакнувајќи дека за релативно краток период оставил силна трага во семејството на Камјани.
Емурлаи кариерата ја продолжува во екипата на Кабала од Азербејџан, каде ќе работи во стручниот штаб на шефот Јетон Беќири, некогаш тренер на Шкендија.
„Збогум“ во овој случај, како што порача клубот, не значи и крај на почитта и благодарноста. Од Камјани му посакаа успех во неговиот следен предизвик, бидејќи Емурлаи кариерата ќе ја продолжи во Кабала од Азербејџан. Воедно, клубот порача дека вратите на Камјани за него секогаш ќе останат отворени.
„Некои луѓе не се мерат со времето што го поминуваат, туку со трагата што ја оставаат зад себе. Благодариме за сè, Бурхан. За нас и за целото семејство на КФ Камјани, секогаш ќе останеш еден од нас. Засекогаш, Маестро“, порача клубот.
Разделбата доаѓа по пет одиграни кола во Втората македонска лига, во кои Камјани освои седум бодови. Дебитантот има учинок од две победи, едно реми и два порази, со пет постигнати и пет примени голови.
Со неговото заминување, тренерското столче во Камјани останува празно. Сега останува да се види кој ќе биде наследникот на Бурхан Емурлаи и кој ќе го предводи дебитантот во продолжението од сезоната.
