По убедливата победа над Струга во Езерското дерби на „Билјанини Извори“, Охрид продолжува со настапите во Супер лигата. „Гладијаторите“ во третото коло ги очекува гостување кај Бутел, каде во сабота (19.09) од 17:00 часот во салата „Антон Димитров“ ќе бараат нови бодови.
Охриѓани во Скопје ќе се соочат со млада и амбициозна екипа која во натпреварот сигурно ќе влезе со голема мотивација и енергија. Томислав Јагуриновски смета дека Охрид ја има фаворитската улога, но нагласува дека тоа треба да се потврди со сериозен пристап, концентрација и одговорна игра во текот на сите 60 минути.
„Играме против Бутел, млада и перспективна екипа која сигурно ќе влезе мотивирано и со многу енергија. Ние сме фаворити и тоа мора да го покажеме на терен, со сериозен пристап и максимална концентрација од почеток до крај. Се надевам дека ќе одиграме добар натпревар и ќе се вратиме со победа.“- изјави Јагуриновски.
По две кола, Охрид ќе се обиде да го продолжи позитивниот почеток на сезоната и со победа да се врати од гостувањето во Скопје. Мечот Бутел – Охрид се игра в сабота од 17:00 часот во салата „Антон Димитров“.
