Младинскиот шампион на Македонија, Брера Струмица, денес го започнува европскиот предизвик во младинската Лига на шампиони. Од 18:00 часот на Националниот стадион во „Андора ла Вела“, Андора, ќе се одигра првиот натпревар од двомечот против Санта Колома.
Во пресрет на дуелот позната е и судиската екипа која ќе ја дели правдата на првиот меч. Главен судија ќе биде Лоик Томас од Луксембург, додека негови помошници ќе бидат Рафаел Морим и Армин Кехоњиќ, исто така од Луксембург. Четврти судија ќе биде Антоан Кјарамонти од Андора.
За Брера Струмица ова претставува ново меѓународно искуство откако струмичкиот клуб стигна до титулата во младинското првенство на Македонија без пораз. Со освоената шампионска титула, младинците на Брера обезбедија настап во Лигата на шампионите и сега ги очекува двомечот со Санта Колома. Струмичани во последните три години, двапати настапуваат во Лигата на шампиони.
Првиот натпревар е закажан за денес од 18:00 часот во Андора, додека реваншот ќе се одигра на домашен терен во Струмица на 14 октомври.
Струмичани ќе се обидат уште на првиот меч да создадат добра основа пред реваншот и на европска сцена да го потврдат квалитетот со кој без пораз стигнаа до младинската шампионска титула во Македонија.
