ФК Скопје продолжува со засилувањето на составот, а клубот во своите редови донесе две искусни имиња – Владица Брдаровски и Милош Гордич.
Брдаровски е искусен десен бек со богата кариера во македонскиот фудбал, но и интернационално искуство. Во досегашната кариера го носел дресот на Пелистер, Работнички, Брно, Ѓер, Вардар, Дрита и Шкупи, а има настапувано и за репрезентацијата на Македонија.
Со долгогодишното искуство од домашното првенство, европските натпревари и репрезентативниот фудбал, Брдаровски треба да донесе дополнителна стабилност, квалитет и лидерски карактер во составот на Скопје.
Покрај него, офанзивната линија е засилена со 33-годишниот српски напаѓач Милош Гордич. Високиот 1,87 метри централен напаѓач во кариерата настапувал за повеќе клубови, меѓу кои и Нови Пазар, додека последниот интернационален предизвик го имаше во Индија, каде го носеше дресот на Намдхари.
Гордич е напаѓач кој се одликува со физичка сила, борбеност и искуство, а од него во Скопје се очекува да донесе дополнителен квалитет во нападот и да помогне со голови.
Со ангажманот на Брдаровски и Гордич, ФК Скопје добива значајно искуство и квалитет на двете страни од теренот, во обид да ги оствари своите амбиции во продолжението од сезоната.
