Двете победи во низа донесоа дополнителен оптимизам во редовите на Шкендија Арачиново, која денеска ќе се обиде да ја продолжи позитивната серија против Скопје, во последниот натпревар од 7. коло во Втората фудбалска лига на Македонија.
По првенствените победи над Башкими со 2-1 и Брегалница со 1-0, тимот од Арачиново во средината на неделата славеше и на гостувањето кај Детонит со 3-1, во рамките на Купот на Македонија.
По три последователни натпревари одиграни на гостински терен, Шкендија Арачиново денеска се враќа пред својата публика, каде што ќе го пречека тимот на Скопје со амбиција да стигне до нови три бода и да ја продолжи одличната серија.
„Како и на секој натпревар, така и сега, одиме на победа. Знаеме дека нема да биде лесно, но сѐ што направивме досега мора да го потврдиме против Скопје и да ја израдуваме нашата публика на домашен терен“, изјави Миле Тодоров.
Дуелите меѓу овие две екипи секогаш носат ефикасен фудбал и многу голови. На претходните две меѓусебни средби, Скопје најпрво ремизираше на домашен терен (2-2), а потоа славеше и како гостин против Шкендија Арачиново со 2-1.
Денешната пресметка се игра на стадионот во Чаир со почеток од 16:00 часот, а главен судија на мечот ќе биде Доне Ристовски.
