Машката сениорска одбојкарска репрезентација на Македонија го претрпе и третиот пораз на Европското првенство, откако денеска беше совладана од актуелниот европски шампион Полска со убедливи 3:0.
Иако Македонија се најде во исклучително тешка група, нашите одбојкари повторно покажаа борбеност и карактер, но силниот противник не дозволи изненадување.
Полска го доби првиот сет со 25:19, во вториот беше уште поубедлива со 25:16, додека во третиот сет славеше со 25:13 за конечни 3:0.
За македонските „спартанци“ ова беше трет пораз во групната фаза, но борбата не завршува тука. Нашата репрезентација има уште два натпревари до крајот на групната фаза, во кои ќе се соочи со селекциите на Израел и Португалија.
Токму овие два дуели ќе бидат нова можност Македонија да стигне до позитивен резултат и да го заврши настапот на Европското првенство со подобар впечаток.
