Денес започна новата сезона во Трета лига регион 6 со натпреварите од првото коло, кои донесоа голем број на погодоци.
Дрита на домашен терен во Боговиње со 7:1 го декласираше тимот на Јехона, во меч каде искусниот Шпенд Асани постигна дури пет погодоци, а по еден гол постигнаа Рамадан Шерифи и Ендрит Алимани. За гостинот утешен гол постигна Албин Љимани.
Дрита победата ја посвети на прерано починатиот млад фудбалер Даниел Николовски, кој денес требаше да го има дебито за тимот од Боговиње.
Во Желино се одигра неизвесен меч каде Доброшти со 1:2 славеше над Лирија. По чистите мрежи во првиот дел гостинот преку Артон Аземи и Милазим Вељии дојде до двојна предност, а во 82. минута Дритон Зеадини постигна гол за ублажување на поразот.
Скендербег со сигурни 2:0 славеше над Кораб од Дебар преку головите на Димеч АНдов и Ќендрим Аљиљи, со што тимот од Дебар кој од оваа сезона се натпреварува во нов регион започна со пораз.
Цетинска преку пресврт триумфираше над Џепчиште на домашен терен со резултат од 4:1. Гостинот преку Дрин Рустеми во 17. минута дојде до предност од 0:1 на полувреме.
Во вториот дел со два брзи гола во 62. минута Лорик Љика израмни на 1:1, а веќе во 64. минута со голот на Исмет Цека резултатот беше 2:1. До крајот од мечот Дурим Љоки и Артин Селамни постигнаа погодоци за 4:1.
Љуботен забележа голема победа од 6:3 над Градец во натпревар каде за домашниот тим хет-трик имаше Бојан Костадиновски, двоен стрелец беше Марко Мишиќ, а еден гол беше дело на Филип Бимбилоски.
За гостинот Ерјон Елмази беше двоен стрелец, а еден гол беше дело на Сокол Исеини.
Гостивар тргна победнички во новата сезона откако на домашен терен преку трите гола на Генц Гаши славеше со 3:1 над Вардар од Брвеница. За гостинскиот тим единствен стрелец беше искусниот Даниел Радески кој погоди во 41. минута од средбата.
