Амбициозниот Илинден со триумф ја започна сезоната во Трета лига регион 1 во која ќе цели на шампионската титула и на бараж за Втора лига како прв фаворит во овој регион.
Тимот на Горан Симов славеше со 1:3 над Аеродром во гости и победнички ја стартува сезоната, но до овој триумф фаворитот се намачи, иако резултатски изгледа сигурно.
По чистите мрежи во првиот дел, Фуад Керими во 49. минута донесе предност за Аеродром, а израмнувањето се случи во 80. минута со голот на Дарио Десниќ. Шест минути подоцна Давид Ристовски направи пресврт на 1:2, а во 89. минута Десниќ со втор гол ги постави конечните 1:3.
Студеничани го доби дуелот со Кул Здравје на кој беа постигнати дури осум погодоци, а домашниот состав беше подобар со 5:3. Шуајб Алити и Хамит Абази беа двојни стрелци за домашниот тим, а пак Филип Костовски си постигна авготол.
За гостинот стрелаше Ангел Петрушевски, а двапати погоди Никола Јовановски.
Беса Сарај забележа победа над новиот третолигаш Марино со резултат од убедливи 4:1. Љавдрим Палику во 6. минута погоди за предност на домаќинот, а потоа Леутрим Таири си постигна автогол за 1:1 три минути подоцна.
До крајот на првиот дел Беса Сарај имаше предност од 3:1 преку Муадх Куртиш и Зирап Имери, а во вториот дел погоди и Ибрахим Мемеди.
Најголема победа забележа Ржаничино откако на домашен терен со 10:0 го декласираше новајлијата Перпарим Нигиштан.
Стефан Богдановски постигна дури пет погодоци, а по еден гол постигнаа Мартин Лазев, Огнен Здравковски, Андреј Бошковски, Даниел Симоновски и Иван Мицевски.
БВК Коњаре со убедлива победа ја отвори новата сезона 2026/2027 откако во гости славеше над Фортуна со резултат од 2:6.
За домашниот тим во финишот од мечот погодија Бејтула Авдулаи и Ахмет Реџепи, додека пак за гостинот двојни стрелци беа Амар Мустафа и Флорент Османи, а по еднаш погодија Газменд Љамалари и Еркан Шаип.
Еден меч заврши без победник откако Башкими Љуботен и Њу Старс ги поделија бодовите играјќи 1:1. За домашните Албан Алија беше стрелец во 8. минута, а за гостинот Петар Котевски во 17. минута.
