КК Кожув Гевгелија го официјализираше ангажманот на американскиот бек/крило Тери Армстронг, кој во новата сезона ќе го носи црвено-белиот дрес и ќе биде дел од ростерот на гевгелискиот прволигаш за сезоната 2026/27.
Армстронг зад себе има богато интернационално искуство. Професионалната кариера ја започна во австралискиот South East Melbourne Phoenix, а потоа настапуваше за словенечка Рогашка, српските Младост Земун и Металац Ваљево, белгискиот Stella Artois Leuven Bears, колумбискиот Toros del Valle, како и македонскиот КК Маџари.
Токму во дресот на Маџари, во сезоната 2025/26, Американецот имаше одлични бројки, со просек од 18,5 поени, 5,2 скока, 4,6 асистенции и 1,9 украдени топки по натпревар.
Неговите одлични настапи во македонската Суперлига му донесоа и значајни индивидуални признанија. Армстронг беше прогласен за Играч на годината, Најдобар дефанзивец, Најдобар странски играч и Најдобар бек.
Со својата атлетичност, разноврсност и квалитет на двете страни од теренот, Армстронг се очекува да биде едно од значајните засилувања на Кожув во пресрет на новата сезона.
Од Кожув се надеваат дека неговото искуство и квалитет ќе донесат дополнителна енергија и стабилност во тимот, кој во сезоната 2026/27 ќе има високи амбиции.
