Овој викенд на програмата ќе бидат натпреварите од првото коло од ракометната Суперлига со што ќе започне новата натпреварувачка сезона 2024/2025.
Во рамки на првото воведно коло актуелниот шампион Еурофарм Пелистер тргнува со одбраната на титулата од Кавадарци каде ќе се соочи со Тиквеш, повраникот Радовиш на домашен терен ќе игра со Охрид во меч каде „гладијаторите“ се апсолутни фаворити за трите бодови.
Неизвесен меч се очекува меѓу Прилеп и Пролет каде трите бодови се висок императив и за двете екипи кои во новата сезона ќе бараат место во плеј-офот. Бутел Скопје сезоната ја отвара на домашен терен како фаворит против Куманово, додека пак Струга во изменет лик на домашен терен како благ фаворит ќе го пречека Ф. Борец од Велес кој за првпат во својата историја ќе заигра во ракометната елита на Македонија.
Овие натпревари се играат во сабота, а колото ќе се комплетира в недела со дербито на колото меѓу Алкалоид и Вардар. Момците на Кирил Лазаров го освоија Суперкупот, максимално мотивирани ќе атакуваат на трумф над Вардар за успешен старт на новата сезона, а Вардар во Автокоманда доаѓа по три бодови.
Александар Ванев, Спортска Мрежа
