Денес на Градскиот стадион во Крива Паланка се одигра пријателски натпревар меѓу Академија Осогово 2022 и Кул од Скопје, во рамки на летните подготовки за новата сезона, а со тоа по 30 години се врати сениорскиот фудбал.
Фудбалска енергија која недостасуваше цели три децении, 30 години жителите на Крива Паланка немаа свои клуб во сениорски фудбал за кого да навиваат, но од денес Крива Паланка е на фудбалската карта на Македонија.
ФК Академија Осогово 2022 во новата сезона ќе се натпреварува во Трета лига регион 2.
„Денес пишуваме нова фудбалска спортска историја на Крива Паланка. По цели 30 години нашиот град повторно има сениорски фудбалски клуб и по 30 годни Крива Паланка се враќа на фудбалската мапа во Македонија. Она што го ветивме, тоа го и остваруваме. Академија Осогово 2022 од оваа сезона ќе ги брани боите и името на Крива Паланка во Третата македонска фудбалска лига. На овие момци сакам да им порачам: „Играјте со срце. Борете се за овој дрес и со гордост носете го името на Крива Паланка“. А, до моите Кривопаланчени имам една порака, да застанеме зад нашиот клуб, да ги наполниме спортските трибините да бидеме нивниот дванаесетти играч и повторно да ја вратиме вистинската фудбалска атмосфера во нашиот град. Затоа што по триесет години фудбалот се враќа повторно дома, тука во Крива Паланка. За нови спортски успеси, за спортски пбоеди и триумфи за нашата најубава Крива Паланка“, вели градоначалникот на општина Крива Паланка, Сашко Митовски.
По 30 години на Градскиот стадион во Крива Паланка ќе се игра сениорскиот фудбал, а градот ќе навива за својот миленик – ФК Академија Осогово 2022.
Натпреварот заврши со триумф од 5:2 за екипата од Крива Паланка.
