Димоски со гол за роденденот ја отвори сезоната, голгетерот погоди за победа на Детонит Плачковица во Чаир

Филип Димоски на најдобар можен начин ја започна новата сезона во Втората македонска фудбалска лига. Голгетерот се запиша во листата на стрелци на гостувањето кај Шкупи и со погодок придонесе за триумфот на Детонит Плачковица од 0:2 на Чаир во рамките на воведното коло.

За Димоски ова беше посебен погодок и поради моментот во кој дојде. 27-годишниот напаѓач пред само два дена го прослави својот роденден, па самиот себеси си подари најубав можен подарок – гол на стартот од новата сезона.

Зад Димоски е одлична голгетерска сезона. Минатата сезона постигна дури 16 погодоци во Втората лига. Есенскиот дел го започна во дресот на прилепска Победа, за која постигна три гола, додека во пролетниот дел продолжи во Осогово и блесна со 13 погодоци.

Особено впечатлив беше неговиот период во Кочани, каде што двапати во сезоната успеа да постигне хет-трик во дресот на „жетварите“.

Димоски низ кариерата настапуваше и за Охрид, 11 Октомври, Каменица Саса, Пити Гули и Вардар Неготино, а Детонит Плачковица е клуб во кој сега по вторпат се враќа. Претходно веќе помина една сезона во составот на радовишкиот второлигаш.

Сезоната, очигледно, ја започнува во свој стил – со гол. А по одличната голгетерска година зад него, Димоски и во новата сезона ќе биде еден од играчите од кои Детонит Плачковица ќе очекува голови и важни бодови.