Кошаркарската репрезентација на Македонија до 16 години со пораз од Бугарија (62-102) го заврши настапот на Европското првенство од Дивизијата „Б“, кое во изминатите денови се одржуваше во Македонија.
Во натпреварот за 13. место, Бугарија беше подобар противник и заслужено стигна до победата. Македонските кадети не успеаја да го повторат пристапот од претходните натпревари, па противникот постепено ја зголемуваше предноста во текот на целиот меч.
Сепак, за оваа генерација шампионатот претставуваше значајно европско искуство и можност за настапи против квалитетни селекции. Нашите млади кошаркари одиграа серија натпревари кои ќе бидат важна основа за нивниот понатамошен развој и напредок.
Во последниот меч, најпрецизни во македонскиот состав беа Александар Зунзуровски и Илија Коневски со по 13 поени, додека Дион Шабани постигна 10.
Македонија така го заврши настапот на 14. место во конкуренција на 22 репрезентации, со ново европско искуство за генерацијата која во иднина треба да биде еден од носителите на македонската кошарка.
