Пелистер продолжува активно да го гради тимот за новата сезона во Втората македонска фудбалска лига, а најново име во ростерот на битолчани е Кире Стојанов.
20-годишниот фудбалер пристигнува од Брера Струмица и игра на позицијата лево крило, а во досегашната кариера настапуваше и за Беласица. Младиот фудбалер зад себе веќе има искуство од највисокиот ранг на македонскиот фудбал, со 29 настапи во Првата лига, на кои постигна четири гола и забележа две асистенции.
Стојанов со своите години и досегашното искуство претставува интересна опција за битолскиот тим, кој во новата сезона влегува со високи амбиции. Пелистер се очекува да биде меѓу главните кандидати за врвот на табелата и борбата за враќање во Првата македонска фудбалска лига.
Битолчани сезоната ќе ја отворат на домашен терен, а првиот предизвик ќе биде дуелот против Камјани во рамките на првото коло. Натпреварот е закажан за недела од 20:00 часот, а на стадионот во Битола ќе се игра под рефлектори.
Со ангажманот на Стојанов, Пелистер продолжува да го комплетира составот и да создава ростер со кој ќе се обиде уште од стартот да ја потврди улогата на еден од фаворитите во второлигашката конкуренција.
