Од денеска до 16 август во Бирмингем, Обединетото Кралство, се одржува Европското првенство во атлетика, на кое Македонија ќе има само еден претставник.
Нашиот најдобар атлетичар, Дарио Ивановски, ќе настапи во дисциплината маратон, каде што ќе се натпреварува со најдобрите европски маратонци.
За маратонот се пријавени вкупно 64 атлетичари, а Ивановски според стартната листа е поставен на 36. место. Неговиот настап е закажан за последниот ден од шампионатот, 16 август, кога ќе трча низ улиците на Бирмингем во обид да стигне до што подобар резултат и пласман.
На шампионатот е предвиден и дополнителен мотив за најуспешните атлетичари. Европската атлетска федерација обезбеди вкупно 500.000 евра преку иницијативата „Златна круна“. Паричниот фонд ќе биде поделен меѓу десет атлетичари – петмина во машка и пет во женска конкуренција – кои ќе постигнат највредни резултати според официјалните бодовни таблици на Светската атлетика.
Интересно е што освојувањето медал не е услов за добивање на овој бонус. Одлучувачки ќе биде квалитетот на постигнатиот резултат, што значи дека и атлетичарите кои нема да стигнат до златото во својата дисциплина ќе имаат можност да бидат наградени доколку остварат резултат со исклучителна вредност.
За Ивановски ова ќе биде уште една голема можност да се претстави на европската сцена и да го потврди своето место меѓу најдобрите македонски атлетичари.
