Брегалница продолжува активно да го засилува играчкиот кадар за новата сезона, а најново име во таборот на штипските „сини“ е бразилскиот фудбалер Матеус Да Силва Лемос, кој и официјално стана нов член на повратникот во Првата македонска фудбалска лига.
Станува збор за 29-годишен фудбалер од Рио де Жанеиро, кој игра на позицијата лево крило, а по потреба може да настапува и на десната крилна позиција. Лемос не е непознато име за македонската фудбалска јавност, бидејќи претходно со успех ги носеше дресовите на Македонија ЃП и Вардар, каде се истакна со својата брзина, техника и игра „еден на еден“.
Интересно е што летово Бразилецот беше промовиран како ново засилување на Шкендија Арачиново, но на крајот се одлучи кариерата да ја продолжи во редовите на Брегалница. Тој веќе една седмица е во тренажен процес со екипата на Никола Кузманов и, според информациите од клубот, одлично се вклопил во новата средина.
Пред да пристигне во Македонија, Лемос настапуваше за бразилските клубови Сан Жозе, Мауа, Комерсијал и Индепенденсија, а од Брегалница истакнуваат дека станува збор за технички одлично поткован фудбалер, кој покрај офанзивните квалитети се одликува со дисциплинирана игра и во дефанзивните задачи.
Штипскиот прволигаш верува дека Лемос ќе донесе дополнителен квалитет во нападот, особено по враќањето во елитното друштво. Брегалница новата сезона ја отвори со пораз од шампионот Вардар (2-0) во Скопје, а веќе во второто коло пред своите навивачи ќе го пречека Арсими, во натпревар во кој ќе се обиде да ги освои првите бодови во новата прволигашка сезона.
