Иако Вардар и Силекс ги завршија своите настапи на европската сцена, двата македонски клуба ќе добијат значителни финансиски средства од УЕФА како дел од солидарната програма за клубовите кои беа елиминирани во квалификациите за европските натпреварувања.
Според распределбата на Европската фудбалска асоцијација, вкупно 75 клубови од 35 земји ќе поделат 40,635 милиони евра, а средствата се распределени во четири категории, зависно од фазата во која клубовите настапиле и биле елиминирани.
Македонскиот шампион Вардар се најде во највисоката категорија и ќе добие 960.000 евра, благодарение на настапите во квалификациите за Лигата на шампионите и Конференциската лига, како и бонусот што следува за национален шампион. На истата листа, покрај „црвено-црните“, се наоѓаат уште Атерт Бисен, Флоријана, Петрокуб, Сутјеска и Њу Сејнтс.
Освојувачот на Купот на Македонија, Силекс, кој беше елиминиран од Динамо Минск, ќе инкасира 325.000 евра, сума предвидена за клубовите што го завршиле европскиот настап уште во првото квалификациско коло.
УЕФА ги подели финансиските средства во четири категории:
- 960.000 евра – за национални шампиони кои настапиле во две квалификациски кола (со шампионски бонус);
- 700.000 евра – за клубови кои одиграле две квалификациски кола;
- 525.000 евра – за екипи што се приклучиле од второто квалификациско коло;
- 325.000 евра – за клубови елиминирани во првото квалификациско коло.
Македонскиот фудбал и понатаму има свој претставник во Европа. Шкендија остана единствениот клуб што продолжува на меѓународната сцена, откако преку пресврт го елиминира словенечки Браво и обезбеди место во третото квалификациско коло од Конференциската лига. Тетовци веќе имаат обезбедено најмалку 700.000 евра, а со евентуален нов успех против шкотски Хибернијан, европската заработка дополнително ќе се зголеми.
Солидарните исплати на УЕФА претставуваат значајна финансиска поддршка за клубовите кои не успеале да обезбедат пласман во групната фаза, овозможувајќи им дополнителни средства за развој и функционирање во текот на сезоната.
