Одбојкарскиот клуб Пелистер Волеј продолжува активно да го комплетира ростерот за новата сезона, а второто големо засилување доаѓа од Соединетите Американски Држави. Нов член на битолскиот клуб е Џејд Вотсон, која од новата сезона ќе го носи дресот на Пелистер.
Станува збор за одбојкарка родена во 2003 година, која настапува на позицијата коректор и е висока 186 сантиметри. Во Битола пристигнува од престижниот универзитетски тим Лајф Универзитет од Мариета, Џорџија, каде зад себе остави одлични настапи.
Вотсон својата одбојкарска кариера ја започнала во Атланта Бум Волејбол Клуб, по што продолжила во Цунами Волејбол Клуб, а потоа и во А5 Волејбол Клуб во Розвел, Џорџија. Следниот чекор во нејзината кариера бил Лајф Универзитет, од каде сега пристигнува во македонскиот вицешампион.
Американката зад себе има импресивна сезона 2025/26, во која беше избрана во првиот идеален тим на ССАЦ конференцијата, ја освои наградата за најкорисен играч (МВП) на својот тим, а се најде и меѓу десетте најдобри одбојкарки во конференцијата според бројот на освоени поени со напад, како и според просечниот број на поени по сет. Воедно, таа беше и еден од главните офанзивни адути и водечки реализатори на својот тим.
Во Пелистер Волеј очекуваат Џејд Вотсон да донесе дополнителен квалитет во нападот и да биде едно од најсилните офанзивни оружја на битолскиот состав во претстојната натпреварувачка сезона, во која клубот ќе има високи амбиции на домашната сцена.
