По повеќе од две недели возбудливи натпревари, вечерва ќе биде спуштена завесата на Меморијалниот турнир во мал фудбал „Влатко Петров 2026“, кој традиционално се одржува во штипската населба Чардаклија и важи за еден од најпрестижните меморијални турнири во Источна Македонија.
На Денот на Републиката – 2 Август, љубителите на малото фудбалско игралиште ги очекува богата програма исполнета со емоции, спорт и почит кон ликот и делото на Влатко Петров.
Програмата започнува во 20:00 часот со свечена церемонија и полагање цвеќе на бистата на Влатко Петров, со што ќе му биде оддадена заслужена почит.
Од 20:30 часот ќе се одигра натпреварот за третото место, во кој силите ќе ги одмерат КМФ Кратово и Украс Инк.
Во 21:30 часот ќе следува доделување благодарници и признанија на спонзорите и покровителите кои дадоа поддршка за успешната организација на турнирот.
Кулминацијата на вечерта е закажана за 22:00 часот, кога во големото финале ќе се сретнат Перо и Тајфата и Компанија Атанасовски. Се очекуваат преполни трибини, одлична атмосфера и неизвесна борба за победничкиот трофеј.
Спортска Мрежа и оваа година е медиумски покровител на Меморијалниот турнир во мал фудбал „Влатко Петров 2026“, продолжувајќи да го поддржува еден од најзначајните спортски настани во регионот.
Сите патишта вечерва водат кон Чардаклија, каде љубителите на спортот ќе имаат можност да бидат дел од уште една незаборавна спортска вечер и свечено да го испратат годинешното издание на турнирот.
