Македонскиот вицешампион Шкендија ги дозна официјалните лица кои ќе ја делат правдата на првиот натпревар против шкотски Хибернијан во рамките на третото квалификациско коло од Конференциската лига на УЕФА.
Европската куќа на фудбалот (УЕФА) ја довери арбитражата на судиска екипа од Кипар. Главен судија на натпреварот ќе биде Менелаос Андониу, а негови помошници ќе бидат Павлос Георгиу и Ираклис Комодромос. Улогата на четврти судија ќе ја извршува Јоанис Христодулу, додека во ВАР-собата ќе бидат Димитрис Солому како ВАР судија и Андреас Техрани како ВАР асистент.
За контролор на судењето е назначен Петер Кари од Финска, додека делегат на натпреварот ќе биде Марцин Стефански од Полска.
Првиот дуел меѓу Хибернијан и Шкендија ќе се одигра во четврток во Единбург, со почеток од 21:00 часот.
Тетовскиот состав до оваа фаза стигна откако во реваншот во Скопје направи голем пресврт и со победата од 3:1 го елиминира словенечки Браво, обезбедувајќи пласман во третото квалификациско коло.
Шкендија воедно е и единствениот македонски претставник кој остана во европските натпреварувања ова лето, а во клубот ќе се надеваат дека ќе го продолжат успешниот континентален настап. Минатата сезона тетовци испишаа историски резултат, настапувајќи во групната фаза на Конференциската лига на УЕФА, а успеаја да обезбедат и европска пролет, што претставува едно од најголемите достигнувања на македонскиот клупски фудбал.
