Македонската машка тениска репрезентација настапува на турнирот „Summer Cup“ во Анкара, каде што се играат натпреварите од Зоната Д. Нашата селекција, во состав Кристијан Јанев, Ерион Незири и Матеј Попов, по првите два меча забележа една победа и еден пораз.
Во воведното коло Македонија загуби од домаќинот Турција со 3:0. Кристијан Јанев беше поразен од Арен Бајбарш со 2:0 во сетови (6:3, 6:4), додека Ерион Незири, иако поведе со 1:0 во сетови, загуби од Орхан Алп Акјол со 2:1 (2:6, 6:1, 6:4). Во натпреварот во двојки, Незири и Попов претрпеа пораз од Бајбарш и Акјол со 2:0 во сетови (4:1, 5:3).
Во разигрувањето за пласман од петтото до осмото место, македонските тенисери остварија убедлива победа над Црна Гора од 3:0. Јанев славеше против Лука Луковац со 6:1 и 6:1, додека Незири по два тај-брејка го совлада Скендер Катана со 7:6(4), 7:6(6). Победа донесе и тандемот Јанев/Попов, кој во мечот во двојки ги победи Луковац и Катана со 2:1 во сетови (4:2, 3:5, 10:3).
Македонија денес ќе се соочи со Хрватска во натпреварот за петтото место, додека во големото финале силите ќе ги одмерат селекциите на Романија и Турција.
