Македонскиот шампион Вардар беше на чекор до голем подвиг во Летонија, но и покрај херојската борба со играч помалку, не успеа да го издржи силниот притисок на Рига, која по продолженија славеше со 5-2 и обезбеди пласман во третото квалификациско коло од Конференциската лига. Во регуларните 90 минути „црвено-црните“ победија со 2-1, со што го анулираа поразот од првиот натпревар, но дополнителните 30 минути му припаднаа на летонскиот првак.
Вардар одлично го отвори реваншот и уште во првите минути се закани преку Герсон Родригеш, а иницијативата ја круниса во 17. минута, кога по одличната асистенција на Иан Пулејо, Давид Бабунски со прецизен удар донесе водство од 0-1.
Само две минути подоцна следуваше моментот што го одбележа натпреварот. Филип Најдовски заработи директен црвен картон како последен играч во одбраната, па Вардар беше принуден речиси целиот натпревар да игра со десетмина. До крајот на првото полувреме Рига создаде голем број шанси, но извонредниот Давор Талески со неколку фантастични интервенции ја зачува предноста на македонскиот шампион.
И покрај играчот помалку, избраниците на Кристијан Фабијани не се откажаа од офанзивната игра. Во 66. минута Родригеш се проби по левата страна, неговиот удар беше одбранет, а Азер Омерагиќ одбиената топка ја претвори во погодок за големи 0-2, резултат кој во тие моменти го носеше Вардар во следната рунда.
Кога изгледаше дека „црвено-црните“ ќе го издржат налетот, Рига успеа да се врати во игра. Во 87. минута Абдулрахман Таиву ја намали предноста на Вардар на 1-2 и го однесе двомечот во продолженија.
Во дополнителните 30 минути домашниот состав ја искористи бројчаната предност. Раки Ауани најпрво израмни на 2-2, а Јаго Сикера донесе целосен пресврт за Рига. Во меѓувреме, по една мешаница покрај аут-линијата, црвен картон заработи и тренерот на Вардар, Кристијан Фабијани.
Во финишот летонскиот шампион целосно го скрши отпорот на изморениот Вардар. Региналдо Рамиреш го зголеми водството, а Каио Фереира во 117. минута ги постави конечните 5-2, со што ја потврди победата и пласманот на Рига во следната фаза.
И покрај елиминацијата, Вардар остави позитивен впечаток со пожртвуваната игра и беше многу блиску до големо европско изненадување. Сепак, играта со фудбалер помалку повеќе од 100 минути се покажа како преголем товар, па европската приказна на македонскиот шампион заврши во второто квалификациско коло од Конференциската лига.
