Младиот македонски тенисер Марко Алексовски (15) оствари уште еден забележителен успех на меѓународната сцена, откако се пласираше во финалето на ИТФ Ј30 турнирот во Солун за играчи до 18 години.
Алексовски турнирот го започна од квалификациите, а со одлични настапи успеа да стигне до финалниот меч. На патот до завршницата одигра вкупно осум натпревари, забележа седум победи и покажа одлична форма. Највпечатлива беше победата над првиот носител, на кого му дозволи да освои само четири гема.
Во големото финале му недостасуваше малку среќа за да стигне до титулата, но и покрај поразот, неговиот настап во Солун претставува значаен успех и уште една потврда за неговиот голем потенцијал. На само 15 години, Алексовски продолжува да бележи одлични резултати и да најавува успешна иднина во македонскиот тенис.
Во најголемиот дел од мечевите Алексовски играше против тенисери, кои се две до три години повозрасни од него.
Резултати на Марко Алексовски на Ј30 Солун:
- коло (квалификации): Одисеас Константину (Грција) 2-0 (61 60)
- коло (квалификации): Фоивос Фасас (Грција) 2-1 (62 36 10-5 на поени)
- коло (квалификации): Тајсон Себастијан Грант (Италија) 2-0 (63 64)
Резултати на главниот турнир:
- коло: Енцо-Зепир Ле Кадре (Франција) 2-0 (60 64)
- коло: Александрос Аверис (Грција, 1 носител) 2-0 (61 63)
1/4 финале: Едоардо Пањони (Италија, 5 носител) 2-1 (64 46 75)
1/2 финале: Денис Валентин Драгомир (Романија) 2-0 (61 62)
Финале: Лазар Младеновиќ (Швајцарија, 2 носител) 1-2 (46 75 46)
Марко Алексовски нема многу време за одмор по одличниот настап во Солун. Веќе од денес го очекува нов предизвик, настап на ИТФ Ј30 турнирот во Софија, каде повторно ќе се натпреварува во конкуренција на тенисери до 18 години.
По финалето во Грција, младиот македонски тенисер ќе се обиде да ја продолжи одличната форма и да забележи уште еден значаен резултат на меѓународната сцена.
