Второлигашот Детонит Плачковица од Радовиш продолжува со екипирање на тимот за новата сезона која стартува на 15 август, кога радовишани ќе се соочи со Шкупи во гости.
Нови имињата во тимот од Радовиш се искусниот Зоран Андонов, како и младиот Асан Риифадов, кој го засилија Детонит Плачковица.
26-годишниот Андонов во Детонит Плачковица доаѓа од прволигашот Силекс, а за него ова значи враќање во Радовиш, бидејќи во минатото го носеше дресот на Детонит Плачковица.
Левиот бек низ неговата кариера настапуваше и за Брегалница, Брера Струмица, Кит Го од Пехчево и Беласица, а Андонов може да игра и како лево и десно крило, што му овозможува на стратегот Горан Здравков можност за комбинации на теренот.
Струмичанецот во Првата македонска фудбалска лига забележа 60 настапи, а на кои постигна два погодоци и запиша пет асистенции.
22-годишниот Рифадов доаѓа од тимот на Шкупи, се работи за дефанзивен играч од средниот ред, кој може да игра и како лев бек. Во неговата кариера настапуваше и за Брера Струмица, Каменица Саса, Слога Виница, Гостивар и последно Шкупи.
Рифадов во Првата лига забележа 26 настапи со една асистенција, а има и четири настапи во Купот на Македонија исто така со една асистенција.
Претходно, како што ексклузивно објави Спортска Мрежа, радовишани се засилија со Махир Ајрули, Марио Аџиев, Филип Димоски и Бранимир Иванов, а според информациите на Спортска Мрежа ќе има уште неколку квалитетни засилувања.
