Екипата на Шкендија Арачиново ќе испише ново поглавје во својата клупска историја, откако со гостувањето кај Струга Трим Лум ќе го има своето деби во Првата македонска фудбалска лига.
Новиот прволигаш по успешната мината сезона и изборениот пласман меѓу елитата, со големи амбиции влегува во новиот предизвик. Првиот испит носи тешко гостување против поранешниот шампион Струга Трим Лум, но во таборот на Шкендија Арачиново веруваат дека можат достојно да се претстават и да ја започнат сезоната со позитивен резултат.
„Среќен сум што ќе бидам дел од овој историски натпревар за клубот од моето родно место. Ова ќе биде наш прв дуел во Првата лига и, без сомнеж, ќе донесе мешавина од емоции, гордост, но истовремено и голема одговорност“, изјави на почетокот Бесир Демири.
Искусниот дефанзивец верува дека тимот од Арачиново имаше квалитетни подготовки за претстојната сезона и затоа верува во позитивен резултат.
„Екипата работеше исклучително добро за време на подготвителната фаза под водство на тренерот Берат Имери. Исто така, донесовме и значајни засилувања за кои верувам дека дополнително ќе го подигнат квалитетот на тимот“, истакнува Демири.
„Судбината сакаше нашиот прв натпревар да биде токму против клуб како Струга – стабилна екипа која со години е во самиот врв на домашниот фудбал. Сепак, ние сме Шкендија и не патуваме во Струга како туристи. Одиме таму да играме фудбал, да го дадеме максимумот и, по интензивниот подготвителен период, да се покажеме во вистинско светло на теренот и да ги видиме резултатите од нашата работа“, заклучи Бесир Демири.
Дуелот меѓу Струга Трим Лум и Шкендија Арачиново ќе се одигра на Градскиот стадион во Струга, со почеток во 17:00 часот.
