Новата сезона во Првата македонска фудбалска лига започнува денеска со дуелот меѓу Тиквеш и Арсими во Кавадарци. Домашниот состав ќе има можност пред своите навивачи да ги освои првите бодови и да испрати јасна порака дека е подготвен за успешна сезона.
Во изминатиот период Тиквеш претрпе сериозни промени – клубот доби ново раководство, нов тренерски тим и значително изменет играчки ростер. Амбициите остануваат високи, а целта е уште од самиот старт да се фати победнички ритам.
Во кавадаречкиот табор со респект гледаат кон новиот прволигаш Арсими, но веруваат дека квалитетот на тимот, домашниот терен и поддршката од трибините ќе бидат доволни за освојување на првите три бода во новиот шампионат.
„Поминавме одлични подготовки, каде игравме со тешки противници и имавме шанса да видиме каде треба да се поправам, а каде сме добри. Првенството сега почнува побрзо од минатите години, и тие грешки не смеат да се повторуваат затоа што целта наша на секој натпревар ќе биде да одиме на победа и што е можно на повисок пласман на крајот на сезоната. Првото коло е најтешко, без разлика на противникот. Но, мислам дека доколку играме дисциплинирано и ги исполниме задачите од нашиот стручен штаб, ќе стигнеме до победа и на најдобар начин ќе ја стартуваме сезоната“, изјави голманот на домашниот тим Христијан Стевковски.
Чуварот на голот на Тиквеш покажа почит кон денешниот противник.
„Арсими има добра екипа која заслужува почит. Тоа го покажа минатата сезона и очекувам тврд натпревар како за прво коло, и нијанси да одлучуваат. Верувам дека со поддршката на нашите навивачи ќе се израдуваме на победа“, вели Стевковски.
