Новото засилување на Пелистер, Костадин Капсаров, со голем ентузијазам го започнува новото поглавје во својата кариера. По одличната сезона во дресот на Брегалница, со која стана шампион во Втората македонска фудбалска лига и избори пласман во елитата, 21-годишниот напаѓач сега ќе ги брани боите на битолскиот клуб.
Капсаров зад себе остави фантастична сезона во Штип, каде со 14 постигнати голови беше најдобар стрелец на Брегалница и еден од најзаслужните за враќањето на „сините“ во Првата лига.
Во својата прва изјава по потпишувањето за Пелистер, Капсаров не ја криеше радоста што ќе го носи зелено-белиот дрес.
„Среќен сум што станав дел од Пелистер. Одлучив да дојдам тука поради одличните услови за работа, добрата средина за напредок и амбициозниот проект на клубот. Доаѓам полн со мотивација и желба да се докажам и верувам дека заедно ќе успееме да го вратиме Пелистер таму каде што припаѓа. Со нетрпение очекувам да заиграм пред битолската публика и ќе дадам сè од себе за да ја оправдам довербата.“
Капсаров претходно во кариерата настапуваше и за АП Брера Струмица, Беласица и Детонит Плачковица.
Пелистер во новата сезона ќе атакува на експресно враќање во Првата македонска фудбалска лига, а првиот предизвик битолчани ќе го имаат на домашен терен против дебитантот Камјани. Со ангажманот на Капсаров, клубот добива напаѓач кој веќе покажа дека знае како се освојуваат бодови и титули во второлигашката конкуренција.
