Суперлигашот Еурофарм Пелистер 2 официјално ги започна подготовките за натпреварувачката сезона 2026/27, во која ќе влезе со нов шеф на стручниот штаб и неколку промени во играчкиот кадар.
Првиот работен состанок и тренинг на битолскиот состав беа одржани под водство на новиот тренер Бранислав Ангеловски, кој ќе ја предводи екипата во новата сезона. Во неговиот стручен штаб ќе бидат Фарук Мемиќ како асистент тренер, Васко Димитровски како кондиционен тренер, Филип Ивановски како тренер на голманите и Иванчо Тодоровски во улога на физиотерапевт.
Во пресрет на новата сезона, клубот го освежи и играчкиот ростер. Нови членови на Еурофарм Пелистер 2 се Александар Стојков, кој пристигнува од Куманово, Марко Трајков од Пролет, Кристијан Симоноски од Алкалоид и Божидар Илиески, кој доаѓа од Прилеп.
Од друга страна, клубот се раздели со Мартин Јовановски, Азис Бен Махфуд, Ненад Белистојаноски, Петар Марковски, Одфред Баптист, Томче Пецаковски, Бојан Гичев и Јован Даневски.
Подготовките ќе се реализираат во Битола, каде тимот ќе ја темпира формата пред почетокот на новата сезона, а во наредниот период ќе одигра и неколку контролни натпревари.
Првиот официјален предизвик за битолчани во Суперлигата ќе биде исклучително тежок, бидејќи во воведното коло од сезоната 2026/27 ќе гостуваат кај актуелниот шампион Вардар 1961.
