Алкалоид и официјално ги започна подготовките за новата натпреварувачка сезона. Со првата прозивка во спортскиот центар „Автокоманда“, избраниците на Кирил Лазаров го означија стартот на новиот тренажен процес во пресрет на сезоната во која клубот ќе има бројни домашни и меѓународни предизвици.
На првиот собир на екипата присуствуваше и генералниот директор и претседател на Управниот одбор на АЛКАЛОИД АД Скопје, Живко Мукаетов, кој им посака на ракометарите пред сѐ добро здравје, успешни подготовки и многу успеси во сезоната што претстои.
Алкалоид ќе има големи предизвици во новата сезона. Покрај настапите во Супер Лигата и Купот на Македонија, тимот ќе биде дел и од новоформираната Регионална лига, во која ќе се натпреварува со екипи од Србија и Црна Гора. На европската сцена, составот повторно ќе настапува во ЕХФ Европскиот куп, натпреварување во кое веќе се запиша во историјата со освојувањето на трофејот во сезоната 2024/25.
Стручниот штаб подготовките ги подели во три фази. Почетниот дел ќе биде реализиран во Скопје, а од 3 август екипата ќе се пресели во Маврово, каде ќе ја одработи главната база на подготовки. Во завршниот дел од тренажниот процес, акцентот ќе биде ставен на одигрување контролни натпревари и темпирање на формата пред стартот на официјалните натпревари.
Со стартот на подготовките, Алкалоид ги отвора подготовките за уште една амбициозна сезона, во која целта ќе биде продолжување на успешните настапи на домашната сцена и достојно претставување на македонскиот ракомет во Европа.
