Екипата на Алкалоид продолжува со екипирањето за новата сезона. Клубот официјално ги претстави трите летни засилувања – словенечките репрезентативци Матиц Сухолежник и Нејц Цехте, како и црногорскиот интернационалец Вуко Борозан, кои треба да донесат дополнителен квалитет во составот на Кирил Лазаров.
Од екипата на Охрид доаѓа Вуко Борозан, искусен лев бек кој зад себе има богата интернационална кариера. Триесет и двегодишниот Црногорец настапувал за повеќе клубови низ Европа и Блискиот Исток, а одлично ја познава и македонската Супер Лига. Со своите 203 сантиметри ќе претставува сериозно засилување во бековската линија на Алкалоид.
Нов член на македонскиот тим е и словенечкиот десен бек Нејц Цехте. Триесет и тригодишниот ракометар минатата сезона ја заврши во редовите на германски Фуксе Берлин, финалист во Лигата на шампионите. Во својата кариера ги носеше дресовите на Кршко, Горење Велење, Хановер, ГОГ, а настапуваше и во македонскиот шампионат како член на Еурофарм Пелистер.
Ростерот ќе го засили и словенечкиот пивот Матиц Сухолежник. Триесет и едногодишниот ракометар, висок 202 сантиметри, во Алкалоид доаѓа од РД Слован, а претходно настапуваше за Целје, француските Данкерк и Саран, португалска Бенфика, како и за хрватскиот шампион Загреб.
Со ангажманот на тројцата искусни интернационалци, Алкалоид дополнително го засилува играчкиот кадар во пресрет на новата сезона, во која клубот ќе има високи амбиции на домашната и на европската сцена.
