Кошаркарската федерација на Македонија ги известува сите македонски кошаркарски тренери дека годинашната задолжителна тренерска клиника ќе се одржи на 24 и 25 август во Скопје, а главен предавач ќе биде еден од најтрофејните и највлијателни европски стручњаци – Светислав Пешиќ.
Станува збор за тренер чие име повеќе од четири децении е симбол на врвни резултати, лидерство и кошаркарска експертиза. Член е на Куќата на славните на ФИБА, европски и светски шампион со репрезентации, освојувач на Евролигата и еден од најценетите тренерски авторитети во светската кошарка.
Во рамките на дводневната клиника, Пешиќ ќе го сподели своето богато знаење и искуство со македонските тренери преку серија стручни предавања и практични сесии.
Клиниката е наменета за сите кошаркарски тренери во Македонија, а присуството е задолжително, бидејќи претставува еден од основните услови за добивање тренерска лиценца за натпреварувачката сезона 2026/27.
Учесниците ќе имаат можност одблиску да се запознаат со современите тренерски принципи, методологијата на работа и филозофијата на еден од најуспешните европски кошаркарски стратези, што претставува значајна можност за стручно усовршување на домашната тренерска фела.
Дополнителни информации за програмата на клиниката, местото на одржување и начинот на пријавување ќе бидат објавени во наредниот период.
